மாணவிகளின் ஒழுக்கம் மற்றும் கல்விக்கு முக்கியத்துவம் : ராணி அண்ணா அரசு மகளிர் கல்லூரி புதிய முதல்வர் ஷீலா

திருநெல்வேலியை ராணி அண்ணா அரசு மகளிர் கல்லூரியில் புதியதாக பொறுப்பேற்ற கல்லூரி முதல்வர் :

திருநெல்வேலி பழைய பேட்டை காந்தி நகர் அருகே அமைந்திருக்கும் ராணி அண்ணா அரசு மகளிர் கல்லூரி ஆனது திருநெல்வேலி மாவட்டத்தை சேர்ந்த மாணவிகளுக்கு மட்டுமல்லாமல் அருகில் இருக்கும் தென்காசி மற்றும் தூத்துக்குடி மற்றும் கன்னியாகுமரி மாவட்டங்களில் இருந்தும் கூட பல ஆயிரக்கணக்கான மாணவிகள் இந்த கல்லூரியில் பயின்று வருகிறார்கள். 

கடந்த 50 ஆண்டுகளுக்கும் மேலாக கல்வித்துறையில் மாணவிகளின் எதிர்கால வாழ்க்கையினை முன்னோக்கி எடுத்துச் செல்லும் வகையில் இங்கு பணியாற்றக்கூடிய ஒவ்வொரு ஆசிரியர்களும் திறம்பட பணியாற்றி வருகிறார்கள். கிராமப்புறங்களில் இருந்து வரக்கூடிய ஏழை எளிய மாணவிகளுக்கு கல்வி என்பது தற்போதைய நவீன காலத்தில் மிகவும் இன்றியமையாத ஒரு முக்கிய விஷயமாக பார்க்கப்படுகிறது. 

அந்த வகையில் மாணவிகளின் எதிர்கால வாழ்க்கை சிறப்பாக அமைய வேண்டும் என்பதற்காக ராணி அண்ணா அரசு மகளிர் கல்லூரி பல்வேறு வசதிகளை மாணவிகளுக்கு செய்து கொடுத்து வருகிறது. அதிலும் குறிப்பாக கல்வியோடு மட்டுமல்லாமல் விளையாட்டு தனிநபர் திறன் மேம்பாடு, வேலைவாய்ப்புக்கான பயிற்சி, நல்லொழுக்கம், என அனைத்தையும் கற்றுக் கொடுக்கிறது. 

புதிய முதல்வர் பொறுப்பேற்பு :

ராணி அண்ணா அரசு மகளிர் கல்லூரிக்கு புதிய முதல்வராக முனைவர் ஷீலா கடந்த ஆகஸ்ட் 1 அன்று பொறுப்பேற்றுக் கொண்டார். இவர் ராணி அண்ணா அரசு மகளிர் கல்லூரியில் இளங்கலை பயின்ற முன்னாள் மாணவி. இந்தக் கல்லூரியிலேயே படித்து தற்பொழுது இந்த கல்லூரிக்கு முதல்வராக வந்ததில் மாணவிகள் மற்றும் ஆசிரியர்களுக்கு மட்டற்ற மகிழ்ச்சி. 

இதுகுறித்து கல்லூரி முதல்வர் ஷீலா கூறும்போது :

"ராணி அண்ணா அரசு மகளிர் கல்லூரி என்பது ஒரு பாரம்பரியமான கல்லூரி. இந்தக் கல்லூரியில் பயின்று வர கூடிய ஒவ்வொரு மாணவிகளும் எனது குழந்தை போல கருதுகிறேன். கற்றலுக்கான அனைத்து சூழலையும் அவர்களுக்கு தேவையான அனைத்து வசதிகளையும் செய்து கொடுக்க என்னால் முடிந்த முயற்சிகளை எடுப்பேன், கல்வி மட்டும் இல்லாமல் மாணவிகளுக்கு மிகவும் முக்கியமானது ஒழுக்கம். எனவே ஒழுக்கத்தோடு கூடிய கல்வியினை எந்த சூழலிலும் நான் சமரசம் செய்து கொள்ள மாட்டேன். மாணவிகளின் எதிர்கால வாழ்க்கை நன்றாக அமைய வேண்டும் என்றால் கல்வியில் தலைசிறந்து விளங்க வேண்டும். கல்லூரி வளாகம் என்பது மிகவும் சுத்தமாக வைத்துக் கொள்ள வேண்டியது மாணவிகளின் கடமை. எனவே சுகாதாரம், ஒழுக்கம், கல்வி இந்த மூன்றிலும் அதிக முக்கியத்துவம் கொடுப்பேன். மாணவிகளின் தனி திறமையை வெளிக் கொண்டு வருவதற்கு கல்லூரியின் முதல்வர் என்ற முறையில் மாணவிகளுக்கு தேவையான வாய்ப்புகளை ஏற்படுத்திக் கொடுப்பேன் என்பதை தெரிவித்துக் கொள்கிறேன். எனவே அனைத்து மாணவிகளும் நன்றாக கல்வி கற்று நாளைய சமுதாயத்தில்  நல்ல நிலைக்கு வர வேண்டும் என்பதே எனது ஆசை" என்று தெரிவித்தார்.

****