தமிழக அரசின் இந்து சமய அறநிலையத்துறையில் வெள்ளை அறிக்கை வெளியிடப்படுமா ? நெல்லை வடக்கு மாவட்ட பாஜக ஆன்மீக பிரிவு தலைவர் சுப்பிரமணியன் கோரிக்கை

தமிழகத்தின் புதிய முதலமைச்சராகப் பொறுப்பேற்றுள்ள மாண்புமிகு திரு. C. ஜோசப் விஜய் அவர்களுக்கு வாழ்த்துகளைத் தெரிவித்துக் கொள்வதாக நெல்லை வடக்கு மாவட்ட பாஜக ஆன்மீக மற்றும் ஆலய மேம்பாட்டுப் பிரிவுத் தலைவர் MGG சுப்ரமணியன் விடுத்துள்ள அறிக்கையில் தெரிவித்துள்ளார்.

மேலும், அந்த அறிக்கையில் அவர் குறிப்பிட்டுள்ளதாவது:

தமிழகத்தில் இந்து சமய அறநிலையத்துறையின் கட்டுப்பாட்டில் பல்லாயிரக்கணக்கான திருக்கோவில்கள் உள்ளன. இந்தத் திருக்கோவில்களுக்குச் சொந்தமாகப் பல லட்சம் கோடி ரூபாய் மதிப்பிலான நிலங்கள் உள்ளிட்ட அசையா சொத்துக்களும், பல லட்சம் கோடி மதிப்பிலான தங்கம், வெள்ளி மற்றும் நவரத்தின ஆபரணங்களும் உள்ளன. தமிழகத்தின் நிதிநிலை குறித்து வெள்ளை அறிக்கை வெளியிடப்படும் என முதலமைச்சர் அறிவித்திருப்பது பாராட்டுக்குரியது. அதேபோல், இந்து சமய அறநிலையத்துறை குறித்தும் வெள்ளை அறிக்கை வெளியிடப்பட வேண்டும். 

கடந்த திமுக ஆட்சிக் காலத்தில் இந்து சமய அறநிலையத்துறை அமைச்சராக இருந்த திரு. சேகர்பாபு அவர்கள், திருக்கோவில்களின் அசையும் மற்றும் அசையா சொத்துக்களை என்ன செய்துள்ளார் என்பது மர்மமாகவும் சந்தேகத்திற்குரியதாகவும் உள்ளது என இந்து பக்தர்கள் கருதுகின்றனர். இது குறித்த உண்மைகளை வெளிக்கொண்டு வர வேண்டியது தற்போதைய அரசின் பொறுப்பாகும்.

முதலமைச்சர் அவர்கள் இந்த விவகாரத்தில் உடனடியாகக் கவனம் செலுத்தி கீழ்க்கண்ட நடவடிக்கைகளை எடுக்க வேண்டும் என வலியுறுத்துகிறேன். இந்து சமய அறநிலையத்துறையின் அமைச்சராக, உண்மையான இந்து தெய்வ பக்தி உள்ள ஒருவரை நியமிக்க வேண்டும்.

அறநிலையத்துறையின் கட்டுப்பாட்டில் உள்ள கோவில்களின் சொத்து விபரங்கள் மற்றும் அதன் தற்போதைய நிலை குறித்து விரிவான வெள்ளை அறிக்கையை வெளியிட வேண்டும்.

தமிழகத்தின் தொன்மையான ஆன்மீகச் சொத்துக்களையும், கோடிக்கணக்கான பக்தர்களின் நம்பிக்கையையும் பாதுகாக்கப் புதிய அரசு உரிய நடவடிக்கை எடுக்கும் என எதிர்பார்ப்பதாக MGG சுப்ரமணியன் தனது அறிக்கையில் குறிப்பிட்டுள்ளார்.