வணிக வளாகம் கட்ட அனுமதி பெற்று தேவாலயம் கட்ட முயற்சி : போராட்டத்தில் முதியவர் உயிரிழப்பு;
100-க்கும் மேற்பட்டோர் கைது!
நெல்லை மாவட்டம் தெற்கு ஏராந்தை பகுதியில், வணிக வளாகம் கட்ட அனுமதி பெற்ற இடத்தில் தேவாலயம் கட்டப்படுவதாகக் கூறி பொதுமக்கள் நடத்திய உள்ளிருப்புப் போராட்டத்தில் முதியவர் ஒருவர் உயிரிழந்த சம்பவம் பெரும் பரபரப்பை ஏற்படுத்தியுள்ளது.
தெற்கு ஏராந்தை பகுதியில் உள்ள ஒரு குறிப்பிட்ட நிலத்தில் வணிக வளாகம் (Shopping Complex) கட்டுவதற்கு நீதிமன்றம் அனுமதி வழங்கியிருந்தது. ஆனால், அந்த அனுமதியை மீறி அங்கு மதமாற்ற நோக்கத்தோடு தேவாலயம் கட்டும் பணிகள் நடைபெற்று வருவதாக அந்த ஊர் பொதுமக்கள் குற்றம் சாட்டுகின்றனர்.
இதற்கு எதிர்ப்பு தெரிவித்து கிராம மக்கள் தொடர் உள்ளிருப்புப் போராட்டத்தில் ஈடுபட்டு வந்தனர். இந்த நிலையில், போராட்டக்களத்தில் இருந்த மணிவேல் (60) என்ற முதியவர் திடீரென உடல்நலக்குறைவு ஏற்பட்டு உயிரிழந்தார்.
போராட்டம் தீவிரமடைவதைத் தடுக்க ஊர் எல்லைகளில் போலீசார் குவிக்கப்பட்டிருந்தனர். இதனால் ஊருக்குள் வர முயன்ற ஆம்புலன்ஸ் வர தாமதமானதாகவும், அந்தத் தாமதமே மணிவேலின் உயிரிழப்பிற்கு முக்கிய காரணம் என்றும் பொதுமக்கள் ஆவேசமாகப் புகார் தெரிவிக்கின்றனர்.
பரபரப்பான சூழல் - 100-க்கும் மேற்பட்டோர் கைது:
முதியவரின் உயிரிழப்பைத் தொடர்ந்து அப்பகுதியில் பதற்றம் அதிகரித்தது. இதனைத் தொடர்ந்து போராட்டத்தில் ஈடுபட்ட நூற்றுக்கும் மேற்பட்டோரை போலீசார் கைது செய்து, திசையன்விளையில் உள்ள ஒரு தனியார் மண்டபத்தில் தங்க வைத்தனர். அங்கு வைக்கப்பட்ட பொதுமக்கள், உணவு மற்றும் தண்ணீரைப் புறக்கணித்து மீண்டும் உள்ளிருப்புப் போராட்டத்தில் ஈடுபட்டனர். "அனுமதிக்கப்பட்ட வணிக வளாகத்தைத் தவிர வேறு எந்த கட்டுமானமும் அங்கு நடக்கக்கூடாது" என்பதில் மக்கள் உறுதியாக உள்ளனர்.
கைது செய்யப்பட்ட பொதுமக்களுக்கு ஆதரவாக இந்து முன்னணி மாநில துணைத் தலைவர் VP ஜெயக்குமார் நேரில் வந்து தனது ஆதரவைத் தெரிவித்தார். தற்போது அந்தப் பகுதியில் பலத்த போலீஸ் பாதுகாப்பு போடப்பட்டுள்ளது. ஆம்புலன்ஸ் வரத் தாமதமானதாக எழுந்த புகார் குறித்து அதிகாரிகள் விசாரணை மேற்கொண்டு வருகின்றனர். கைதாகி சிறையில் இருக்கும் பொது மக்களை நேரில் சந்தித்து தங்களது ஆதரவினை தெரிவிப்பதற்காக நெல்லை தெற்கு மாவட்ட பாஜக தலைவர் தமிழ்ச்செல்வன், தமிழக பாஜக இளைஞரணி மாநில துணை தலைவர் அசோக், நாங்குநேரி கிழக்கு ஒன்றிய பாஜக தலைவர் கண்ணன் உட்பட பாஜக நிர்வாகிகள் நேரில் சென்று ஆதரவு தெரிவித்தனர்.
****