நெல்லையப்பர் கோவிலில் நரிக்குறவர் இன குழந்தைகளுடன் பாஜக இளைஞரணி நிர்வாகிகள் தங்கத்தேர் இழுத்து வழிபாடு!

நெல்லையப்பர் கோவிலில் சமபந்தி விருந்தில் நரிக்குறவர் இன குழந்தைகளுக்கு அனுமதி மறுக்கப்பட்டதாக எழுந்த சர்ச்சையைத் தொடர்ந்து, இன்று அதே குழந்தைகளை அழைத்து வந்து தங்கத்தேர் இழுக்க வைத்து பாஜக இளைஞரணி நூதன முறையில் தனது ஆதரவைத் தெரிவித்துள்ளது.

கடந்த பிப்ரவரி 3-ஆம் தேதி (நேற்று முந்தினம்), பேரறிஞர் அண்ணா அவர்களின் நினைவு நாளை முன்னிட்டு தமிழக அரசு சார்பில் நெல்லையப்பர் கோவிலில் சமபந்தி விருந்து நடைபெற்றது. சபாநாயகர் அப்பாவு மற்றும் நெல்லை மாநகராட்சி மேயர் ராமகிருஷ்ணன் ஆகியோர் தலைமையில் நடைபெற்ற இந்நிகழ்வில், கலந்து கொள்ள வந்த நரிக்குறவர் இன குழந்தைகளுக்கு அனுமதி மறுக்கப்பட்டதாகப் புகார் எழுந்தது.

இது குறித்து கோவில் நிர்வாகம் தரப்பில் விளக்கம் அளிக்கையில், "உணவு தீர்ந்துவிட்ட காரணத்தினாலேயே குழந்தைகள் அனுமதிக்கப்படவில்லை" என்று கூறப்பட்டது. இருப்பினும், இது ஒரு திட்டமிட்ட புறக்கணிப்பு என்று பல்வேறு தரப்பினர் கண்டனம் தெரிவித்தனர்.

இந்தச் சம்பவம் தொடர்பாக முழுமையான விசாரணை நடத்தப்பட வேண்டும் எனவும், கோவில் முழுவதிலும் உள்ள சிசிடிவி காட்சிகளை வெளியிட வேண்டும் எனவும் கோரிக்கைகள் எழுந்தன. கோவில் நிர்வாகம் வெளியிட்ட ஒரு குறிப்பிட்ட பகுதியின் சிசிடிவி காட்சிகளில் நம்பகத்தன்மை இல்லை என்று கூறி, இன்று நெல்லை மாநகர காவல்துறை ஆணையாளரிடம் நெல்லை மாவட்ட பாஜக சார்பில் புகார் அளிக்கப்பட்டது.

 தீண்டாமை தடுப்புச் சட்டத்தின் கீழ் உரிய நடவடிக்கை எடுக்க வேண்டும் என்று அந்த மனுவில் வலியுறுத்தப்பட்டுள்ளது.

சர்ச்சை ஒருபுறம் இருக்க, பாதிக்கப்பட்ட குழந்தைகளுக்கு ஆதரவு தெரிவிக்கும் வகையில் இன்று நெல்லை வடக்கு மாவட்ட பாஜக இளைஞரணி தலைவர் கந்தசாமி தலைமையில் ஒரு நெகிழ்ச்சியான நிகழ்வு நடைபெற்றது.

 சமபந்தி உணவு மறுக்கப்பட்டதாகக் கூறப்படும் அதே நரிக்குறவர் இன குழந்தைகளையும், பெரியவர்களையும் பாஜகவினர் கோவிலுக்கு அழைத்து வந்தனர்.

  அவர்களுக்குத் தங்கத்தேர் இழுக்கும் வாய்ப்பு ஏற்படுத்தித் தரப்பட்டது. தேரின் வடத்தைப் பிடித்தபடி குழந்தைகள் மற்றும் பெரியவர்கள் உற்சாகமாகத் தேர் இழுத்தனர்.

  "வெற்றிவேல் முருகனுக்கு அரோகரா", "வீரவேல் முருகனுக்கு அரோகரா" மற்றும் "ஓம் சிவாய நமஹ" என்ற பக்தி முழக்கங்களுடன் கோவில் வளாகமே அதிரும் வகையில் அவர்கள் வழிபாடு நடத்தினர்.

நேற்று முந்தினம் உணவருந்தத் தடையாக இருந்த அதே இடத்தில், இன்று இறைவனுக்குரிய தங்கத்தேரை இழுத்துச் சென்றது நரிக்குறவர் இன மக்களிடையே பெரும் மகிழ்ச்சியை ஏற்படுத்தியது. அரசியல் ரீதியான மோதல்களுக்கு மத்தியிலும், பாதிக்கப்பட்ட குழந்தைகளுக்கு முன்னுரிமை அளிக்கப்பட்டு அவர்கள் கௌரவிக்கப்பட்ட விதம் அங்கிருந்த பொதுமக்களிடையே நெகிழ்ச்சியையும், வரவேற்பையும் பெற்றது.

இந்தச் சம்பவம் தற்போது நெல்லை மாவட்டத்தில் சமூக வலைதளங்களிலும், அரசியல் வட்டாரத்திலும் பெரும் பேசுபொருளாக மாறியுள்ளது.

****