மத்திய அரசின் பட்ஜெட் : இந்திய மக்களுக்கான பட்ஜெட் - நெல்லை தெற்கு மாவட்ட வர்த்தக அணி தலைவர் மைக்கேல் ராஜ்
மத்திய பட்ஜெட் 2026: வளர்ந்த பாரதத்திற்கான அடித்தளம் – நெல்லை மைக்கேல் ராஜ் வரவேற்பு
பாரதப் பிரதமர் நரேந்திர மோடி தலைமையிலான மத்திய அரசு இன்று தாக்கல் செய்துள்ள 2026-27 நிதியாண்டுக்கான பட்ஜெட், இந்தியாவின் பொருளாதார வளர்ச்சியைப் புதிய உயரத்திற்கு எடுத்துச் செல்லும் ஒரு தொலைநோக்குப் பார்வை கொண்ட அறிக்கை என்று நெல்லை தெற்கு மாவட்ட பாஜக வர்த்தக அணி தலைவர் மைக்கேல் ராஜ் வரவேற்பு தெரிவித்துள்ளார்.
"மத்திய நிதியமைச்சர் திருமதி நிர்மலா சீதாராமன் அவர்கள் இன்று தாக்கல் செய்த பட்ஜெட், சாமானிய மக்கள், விவசாயிகள் மற்றும் சிறு தொழில் முனைவோரின் நலனை மையமாகக் கொண்டு உருவாக்கப்பட்டுள்ளது. குறிப்பாக, வரி செலுத்தும் முறையை எளிதாக்கும் வகையில் அறிவிக்கப்பட்டுள்ள 'புதிய வருமான வரிச் சட்டம் 2025' மற்றும் வரி கணக்கு தாக்கலுக்கான கால அவகாசம் நீட்டிப்பு போன்றவை நடுத்தர வர்க்கத்தினருக்குப் பெரும் நிம்மதியை அளித்துள்ளது.
விவசாயத் துறையில் டிஜிட்டல் தொழில்நுட்பத்தைப் புகுத்தும் 'பாரத் விஸ்தார்' திட்டம் மற்றும் கிராமப்புறப் பெண்களைத் தொழில் முனைவோராக மாற்றும் 'ஷி-மார்ட்ஸ்' (She-Marts) போன்ற அறிவிப்புகள் நாட்டின் அடித்தட்டு மக்களின் பொருளாதாரத்தை வலுப்படுத்தும். அதேபோல், புற்றுநோய் மருந்துகளுக்கான வரி விலக்கு மற்றும் செல்போன் உள்ளிட்ட மின்னணு சாதனங்களின் விலை குறைப்பு ஆகியவை சாமானியர்களுக்குக் கிடைத்த மிகப்பெரிய வெற்றியாகும்.
தமிழகத்தைப் பொறுத்தவரை, சென்னை - பெங்களூரு மற்றும் சென்னை - ஹைதராபாத் ஆகிய நகரங்களை இணைக்கும் அதிவேக ரயில் வழித்தடங்கள் மற்றும் தமிழகத்தில் அமையவுள்ள அரிய கனிமங்களுக்கான பிரத்யேக வழித்தடம் (Rare Earth Minerals Corridor) போன்ற அறிவிப்புகள் மாநிலத்தின் தொழில் வளர்ச்சியைப் பன்மடங்கு பெருக்கும்.
ஒட்டுமொத்தமாக, ஏழை எளிய மக்களின் வாழ்வாதாரத்தை உயர்த்தும் இந்த பட்ஜெட்டை நெல்லை தெற்கு மாவட்ட வர்த்தக அணியின் சார்பில் மனதார வரவேற்கிறோம்," என்று அவர் குறிப்பிட்டுள்ளார்.
****