தூத்துக்குடியில் தெப்பக்குளத்தைச் சுற்றிய கிரானைட் கற்கள் திடீர் சரிவு: அரசுக்கு கடும் கண்டனம் : S.சங்கர சுப்பிரமணியன், மாநில செயலாளர் ஆன்மீகம் மற்றும் திருகோவில் மேம்பாட்டு பிரிவு

தூத்துக்குடியில் தெப்பக்குளத்தைச் சுற்றிய கிரானைட் கற்கள் திடீர் சரிவு: பராமரிப்புப் பணிகள் பாதிப்பு

தூத்துக்குடி நகரின் மையப்பகுதியில் அமைந்துள்ள இந்து சமய அறநிலையத்துறைக்குச் சொந்தமான தெப்பக்குளத்தைச் சுற்றி அமைக்கப்பட்டிருந்த கிரானைட் கற்கள், குளத்தில் ஏற்பட்ட அதிக நீரின் அழுத்தம் காரணமாக இன்று (டிசம்பர் 12) திடீரெனச் சரிந்து விழுந்தன.

மாநகராட்சிப் பகுதியில் அமைந்துள்ள இந்தத் தெப்பக்குளத்தின் மேற்குப் பகுதியில் நீரின் அளவு தற்போது அதிகமாக உள்ள நிலையில், இந்த அழுத்தத்தைத் தாங்க முடியாமல் குளத்தின் கரையோரத்தில் பதிக்கப்பட்டிருந்த கிரானைட் கற்கள் உடைந்து கீழே விழுந்தன. இந்தச் சரிவால் தெப்பக்குளத்தின் கரையானது மிகவும் மோசமாகப் பாதிக்கப்பட்டிருக்கிறது. இந்தக் குளம், அருகில் உள்ள சிவன் கோவில் வசந்த மண்டப விழாவிற்குப் பயன்படுத்தப்படும் இடமாக உள்ளது குறிப்பிடத்தக்கது.

தெப்பக்குளத்தைச் சீரமைத்து, அதனைச் சுற்றிலும் 'வாக்கிங் ட்ராக்' அமைக்கும் பணி மற்றும் கரைகளை அழகுபடுத்தும் பணிகள் ஏற்கனவே சுமார் ரூ. 65 லட்சம் மதிப்பீட்டில் நடைபெற்று வருகின்றன. இந்தப் பணிகள் நடந்துகொண்டிருந்த வேளையில் விபத்து ஏற்பட்டதால், மேலும் பாதிப்பு ஏற்படுவதைத் தவிர்க்கும் நோக்கில் பராமரிப்புப் பணிகள் அனைத்தும் உடனடியாகத் தற்காலிகமாக நிறுத்தப்பட்டுள்ளன. விபத்து குறித்து தகவல் அறிந்தவுடன் மாநகராட்சி ஆணையர் உள்ளிட்ட பொதுப்பணித்துறை அதிகாரிகளும் சம்பவ இடத்துக்கு விரைந்து வந்து ஆய்வு மேற்கொண்டனர். தெப்பக்குளத்தில் உள்ள தண்ணீரை வெளியேற்றி, உடைந்து விழுந்த கற்களை அகற்றிச் சீரமைப்புப் பணிகளை விரைவில் மேற்கொள்ள அதிகாரிகள் திட்டமிட்டுள்ளதாகத் தெரிவிக்கப்பட்டுள்ளது. இதற்கு அரசின் அலட்சியப்போக்கும், மக்களின் வரிப்பணத்தை வீணாக்கும் தமிழக அரசிற்கு S.சங்கர சுப்பிரமணியன், (மாநில செயலாளர் ஆன்மீகம் மற்றும் திருகோவில் மேம்பாட்டு பிரிவு) அவர்கள் தனது கடும் கண்டனத்தை பதிவு செய்துள்ளார்.

*****