தமிழ்நாட்டில் மதுக்கடைகள் அதிகரித்துவிட்டன, இணையதளங்கள் மூலம் குற்றங்கள் பெருகிவிட்டன : தளபதி பிச்சையா
திராவிட முன்னேற்றக் கழகத்தின் மதுக் கொள்கை: தமிழக பாஜக பட்டியல் அணி மாநில செயலாளர் தளபதி பிச்சையா கடும் குற்றச்சாட்டு!
தமிழகத்தில் ஆளும் திராவிட முன்னேற்றக் கழக (திமுக) அரசு மதுக்கடைகளை மூடுவதற்குப் பதிலாக, மேலும் புதிய கடைகளைத் திறப்பதன் மூலம் தேர்தல் வாக்குறுதிகளை நிறைவேற்றத் தவறிவிட்டது என்று தமிழக பாரதிய ஜனதா கட்சியின் (பாஜக) மாநில பட்டியல் அணி செயலாளர் தளபதி பிச்சையா குற்றம் சாட்டியுள்ளார்.
வரும் டிசம்பர் 6-ஆம் தேதி சட்டமேதை டாக்டர் பி.ஆர். அம்பேத்கர் அவர்களின் நினைவு நாளை முன்னிட்டு, திருநெல்வேலியில் தமிழக பாஜக மாநிலத் தலைவர் திரு. நயினார் நாகேந்திரன் தலைமையில் மௌன ஊர்வலம் நடைபெற உள்ளதாக தளபதி பிச்சையா தெரிவித்தார்.
தமிழக அரசு ஏற்கனவே இருக்கும் மதுக்கடைகளை மூடாமல், கூடுதலாக புதிய புதிய மதுக்கடைகளைத் திறக்கிறது. இதன் மூலமாக தேர்தல் வாக்குறுதியில் கொடுத்த எதையும் நிறைவேற்றவில்லை," என்று அவர் சாடினார். தென் மாவட்டங்களில் சாதிய மோதல்கள் அதிகரித்துள்ளதற்கான புள்ளிவிவரங்கள் தெரிந்தும், "தென் மாவட்டங்களில் சாதி மோதல் இல்லை" என்று சபாநாயகர் தொடர்ந்து பேசி வருவது விசித்திரமாக உள்ளது.
இணையதளங்கள் மூலமாக சாதிய அடையாளத்துடன், சாதிய வன்மங்கள் நிறைந்த பதிவுகள் மூலம் வன்முறைகள் ஏற்படுவதற்கு வாய்ப்புகள் அதிகமாக உள்ளது. இந்த இணையதளங்களைப் தமிழக அரசும், காவல் துறையும் முறையாகக் கண்காணிக்கத் தவறிவிட்டன என்றும் அவர் குற்றம் சாட்டினார்.
மாநிலத் தலைவர் நயினார் நாகேந்திரனின் எழுச்சிப் பயணத்திற்கான ஆலோசனை
மேலும், தென் மாவட்டங்களில் தமிழக பாஜக மாநிலத் தலைவர் அவர்களின் "புரட்சித் தமிழனின் எழுச்சிப் பயணம்" மக்களைச் சந்திக்கும் நிகழ்வு குறித்தும் ஆலோசிக்கப்பட்டது. திருநெல்வேலி, தூத்துக்குடி மற்றும் கன்னியாகுமரியில் இந்தப் பயணத்திற்குச் சிறப்பான வரவேற்புகள் மற்றும் ஏற்பாடுகள் செய்வது குறித்து ஆலோசனைகள் நடத்தப்பட்டன.
இந்த ஆலோசனைக் கூட்டத்தில் தமிழக பாஜக பட்டியல் அணி பிரிவின் மாவட்ட மற்றும் மாநில நிர்வாகிகள் கலந்து கொண்டனர்.