நெல்லை அரசு மருத்துவமனையில் 7-வது நாளாக செவிலியர்கள் போராட்டம் - த.வெ.க நிர்வாகிகள் நேரில் ஆதரவு!
தமிழகம் முழுவதும் 10 அம்ச கோரிக்கைகளை வலியுறுத்தி செவிலியர்கள் மேற்கொண்டு வரும் தொடர் போராட்டம் இன்று 7-வது நாளை எட்டியுள்ளது. இதன் ஒரு பகுதியாக, திருநெல்வேலி அரசு மருத்துவக் கல்லூரி மருத்துவமனை வளாகத்தில் செவிலியர்கள் தீவிரப் போராட்டத்தில் ஈடுபட்டு வருகின்றனர். அவர்களுக்கு ஆதரவாக தமிழக வெற்றிக்கழக தூத்துக்குடி வடக்கு மாவட்ட நிர்வாகிகள் நேரில் வந்து தங்களது ஆதரவுகளை தெரிவித்தார்கள்
கடந்த சட்டமன்றத் தேர்தலின் போது தி.மு.க அளித்த வாக்குறுதிகளை நிறைவேற்றவில்லை எனக் கூறி, தமிழக அரசுக்கும் சுகாதாரத் துறைக்கும் எதிராக செவிலியர்கள் கோஷங்களை எழுப்பினர். தொகுப்பூதியத்தில் பணியாற்றும் செவிலியர்களை பணி நிரந்தரம் செய்ய வேண்டும்.சம வேலைக்கு சம ஊதியம் என்ற அடிப்படையில் ஊதிய உயர்வு வழங்க வேண்டும்.உள்ளிட்ட முக்கிய கோரிக்கைகளை வலியுறுத்தி இந்த அறப்போராட்டம் நடைபெற்று வருகிறது.
த.வெ.க நிர்வாகிகள் ஆதரவு:
இந்நிலையில், நெல்லை அரசு மருத்துவமனையில் போராடி வரும் செவிலியர்களுக்கு ஆதரவு தெரிவிக்கும் வகையில், தமிழக வெற்றிக் கழகத்தின் நிர்வாகிகள் இன்று போராட்டக் களத்திற்கு நேரில் சென்றனர்.
தூத்துக்குடி வடக்கு மாவட்டத்தைச் சேர்ந்த கயத்தாறு கிழக்கு ஒன்றிய செயலாளர் சுப்பிரமணியம் தலைமையில் திரண்ட த.வெ.க நிர்வாகிகள், செவிலியர்களைச் சந்தித்து அவர்களின் கோரிக்கைகளுக்குத் தங்களது முழுமையான ஆதரவை வழங்கினர். அரசின் கவனத்தை ஈர்க்கும் வகையில் செவிலியர்கள் நடத்தி வரும் இந்தப் போராட்டத்திற்கு அரசியல் அமைப்புகள் ஆதரவு தெரிவித்து வருவது குறிப்பிடத்தக்கது.
இதுகுறித்து சுப்பிரமணியம் தெரிவிக்கையில் :-
தமிழக முழுவதும் செவிலியர்கள் தங்களது நியாயமான கோரிக்கைகளை முன்னிறுத்தி போராட்டம் நடத்தி வருகிறார்கள். திமுக அரசு கொடுத்த வாக்குறுதியை நிறைவேற்ற வேண்டும். கடும் குளிரிலும் செவிலியர்கள் இரவு பகலாக இங்கு போராட்டம் நடத்தி வருகிறார்கள். நியாயமான கோரிக்கையை முன்னிறுத்தி போராடும் செவிலியர்களுக்கு தமிழக வெற்றிக் கழகம் என்றும் உறுதுணையாக இருக்கும் என்று தெரிவித்தார்.
*******