தீர்மான நகலை கிழித்து மாநகராட்சி ஆணையாளரிடம் கொடுத்த திமுக கவுன்சிலர் ! நெல்லை மாநகராட்சி மாமன்ற கூட்டத்தில் பரபரப்பு

நெல்லை மாமன்றக் கூட்டத்தில் பரபரப்பு: தீர்மான நகலை கிழித்து நெல்லை மாநகராட்சி ஆணையாளரிடம் வழங்கிய திமுக கவுன்சிலர்

திருநெல்வேலி மாநகராட்சியில் இன்று மாலை நடைபெற்ற மாமன்றக் கூட்டத்தில், தனது வார்டுக்குத் தேவையான முக்கியப் பணி தொடர்பான தீர்மானத்தை நிறைவேற்றாமல் இழுத்தடித்ததைக் கண்டித்து, திமுக கவுன்சிலர் ஒருவர் தீர்மான நகலைக் கிழித்து மாநகராட்சி ஆணையாளரிடம் அளித்த சம்பவம் பெரும் பரபரப்பை ஏற்படுத்தியது.

நெல்லை மாநகராட்சியின் 7வது வார்டு திமுக கவுன்சிலர் இந்திரா மணி. இவரது வார்டுக்கு உட்பட்ட மனகாவலம்பிள்ளை நகர், திருமலை தெரு பகுதியில் மழைக்காலங்கள் மற்றும் பிற நேரங்களில் தண்ணீர் தேங்குகிறது. தேங்கும் தண்ணீரைக் கட்டுப்படுத்தவும், பொதுமக்களின் சிரமத்தைப் போக்கவும் அங்கு ஒரு தடுப்புச் சுவர் அமைக்க வேண்டியது அவசியம் என்று அவர் வலியுறுத்தி வந்தார்.

இது தொடர்பாக அவர் கடந்த ஒரு வருடத்திற்கும் மேலாக மாநகராட்சி நிர்வாகத்திடம் மனு கொடுத்து வந்துள்ளார். மேலும், அந்தத் தடுப்புச் சுவர் பணிக்காக ரூ. 6 லட்சம் நிதி நகராட்சி நிர்வாக துறையால் ஒதுக்கீடு செய்யப்பட்டுள்ளதாகவும் கூறப்படுகிறது 

நிதி ஒதுக்கப்பட்ட பின்னரும், அந்தப் பணிக்கான தீர்மானத்தை மாமன்றத்தில் நிறைவேற்றாமல், மேயர் மற்றும் மாநகராட்சி ஆணையாளர் ஆகியோர் தொடர்ந்து இழுத்தடித்து வருவதாக கவுன்சிலர் இந்திரா மணி குற்றம் சாட்டினார். இதனால், தனது வார்டு மக்களின் அடிப்படைத் தேவை பூர்த்தி செய்யப்படாமல் இருப்பதாக அவர் மன வேதனையுடன் தெரிவித்தார்.

இந்த நிலையில், இன்று நடைபெற்ற மாமன்றக் கூட்டத்தின் போது, கவுன்சிலர் இந்திரா மணி இந்த விவகாரத்தை மீண்டும் எழுப்பினார். தனது கோரிக்கை நிராகரிக்கப்படுவதால் ஏற்பட்ட ஆத்திரத்தில், அவர் தனது வார்டு சம்பந்தப்பட்ட அந்தத் தீர்மானத்தின் நகலை எடுத்துக் கிழித்தார். கிழித்த அந்தத் தீர்மான நகலை, அவர் உடனடியாக மாநகராட்சி ஆணையாளரிடம் கொடுத்தார். இந்த எதிர்பாராத செயலால் மாமன்ற உறுப்பினர்கள் மற்றும் அதிகாரிகள் மத்தியில் பெரும் பரபரப்பு ஏற்பட்டது.

திமுக கவுன்சிலரின் வார்டிலேயே இந்த நிலைமை என்றால் மற்ற கவுன்சிலர் வார்டில் எந்த வேலை முறையாக நடைபெற்று இருக்கும்?? என்று கேள்வி எழுந்துள்ளது.

*********