நெல்லையில் இந்து முன்னணி மற்றும் பாஜக நிர்வாகிகள் அதிரடி கைது : பதற்றம்
திருப்பரங்குன்றம் மலைமீது கார்த்திகை தீபம் ஏற்றி வழிபடுவதற்கான நீதிமன்ற அனுமதியை எதிர்த்து தமிழக அரசு மேல்முறையீடு செய்திருப்பதைக் கண்டித்தும், இந்துக்களின் வழிபாட்டு உரிமையை அவமதிக்கும் வகையில் தொடர்ச்சியாக செயல்பட்டு வருவதாகக் கூறி தி.மு.க. அரசை கண்டித்தும், இன்று தமிழகம் முழுவதும் இந்து முன்னணி அமைப்பினர் சார்பில் கண்டன ஆர்ப்பாட்டங்கள் நடத்தப்படும் என அறிவிக்கப்பட்டிருந்தது.
அதன் ஒரு பகுதியாக, நெல்லை மாவட்டத்தில் இந்து முன்னணி மற்றும் பாரதிய ஜனதா கட்சியின் நிர்வாகிகள் மற்றும் தொண்டர்கள் திரண்டு வந்து கண்டன ஆர்ப்பாட்டம் நடத்த ஆயத்தமாயினர்.
எனினும், காவல்துறை அனுமதியின்றி ஆர்ப்பாட்டம் நடத்த முயற்சி செய்ததாகக் கூறி, நெல்லையின் பல்வேறு பகுதிகளில் இந்து முன்னணி மற்றும் பாரதிய ஜனதா கட்சி நிர்வாகிகளைப் போலீசார் ஆங்காங்கே தடுத்து நிறுத்தி கைது செய்தனர்.
திருப்பரங்குன்றம் மலையின் உச்சியில் தீபம் ஏற்ற பல ஆண்டுகளாக இருந்து வந்த நடைமுறையை நீதிமன்றம் மீண்டும் உறுதி செய்த நிலையில், அதற்கு எதிராக தமிழக அரசு மேல்முறையீடு செய்தது இந்து அமைப்புகளிடையே பெரும் கொந்தளிப்பை ஏற்படுத்தியுள்ளது.
இந்துக்களின் வழிபாட்டு உரிமையில் தமிழக அரசு தலையிடுவதாகவும், திட்டமிட்டு இந்து விரோத போக்கைக் கடைப்பிடிப்பதாகவும் குற்றம் சாட்டி, இந்த கைது நடவடிக்கைகளையும் மீறி இந்து அமைப்புகள் தங்கள் போராட்டத்தை முன்னெடுத்துச் செல்ல முயன்றனர்.
திருப்பரங்குன்றம் தீப விவகாரத்தில், வழிபட அனுமதி அளித்த நீதிமன்ற உத்தரவுக்கு எதிராக தமிழக அரசு செய்த மேல்முறையீட்டை உடனடியாகத் திரும்பப் பெற வேண்டும்.
இந்து சமய அறநிலையத் துறை, இந்துக்களின் நம்பிக்கைகள் மற்றும் வழிபாட்டு உரிமைகளில் தலையிடுவதைத் தவிர்க்க வேண்டும்.
அரசு இந்துக்களை அவமதிக்கும் வகையில் செயல்படுவதை நிறுத்திக் கொள்ள வேண்டும்.இந்தப் போராட்டங்கள் தமிழக அரசியலில் புதிய சர்ச்சையை உருவாக்கியுள்ளன.