திருப்பரங்குன்றம் மலை விவகாரம் : தமிழக அரசின் மேல்முறையீடு இந்துக்களிடையே அதிர்ச்சியை ஏற்படுத்தி உள்ளது அதிர்ச்சியை ஏற்படுத்தி உள்ளது
மதுரை திருப்பரங்குன்றம் முருகன் கோயில் மலைமீது கார்த்திகை தீபம் ஏற்றிக் கொள்ள உயர்நீதிமன்றம் அனுமதி வழங்கி உத்தரவு பிறப்பித்த நிலையில், அதனை எதிர்த்து தமிழக அரசின் இந்து சமய அறநிலையத்துறை (HR&CE) மேல்முறையீடு செய்ய திட்டமிட்டுள்ளதற்குத் தமிழக பாஜக மாநில இளைஞரணி துணைத் தலைவர் வெற்றிவேல் அவர்கள் கடும் கண்டனத்தைத் தெரிவித்துள்ளார்.
இந்த விவகாரம் கோடிக்கணக்கான இந்து மக்களின் மத உணர்வுகளைப் புறக்கணிப்பதாக உள்ளது என்றும் அவர் குற்றம் சாட்டியுள்ளார்.
நீண்ட காலமாக சர்ச்சையில் இருந்து வந்த திருப்பரங்குன்றம் மலைமீது கார்த்திகை தீபம் ஏற்றுவது தொடர்பான வழக்கில், சமீபத்தில் உயர்நீதிமன்றம் அனுமதி வழங்கி உத்தரவிட்டது. இது இந்து பக்தர்களுக்குப் பெரும் மகிழ்ச்சியை அளித்த நிலையில், இந்தத் தீர்ப்பை எதிர்த்து அறநிலையத்துறை மேல்முறையீடு செய்ய முடிவெடுத்திருப்பது அதிர்ச்சியை ஏற்படுத்தியுள்ளது.
இந்தச் சூழலில், தமிழக பாஜக மாநில இளைஞரணி துணைத் தலைவர் வெற்றிவேல் இதுகுறித்து கூறும்போது :
"தமிழக அரசின் இந்த முடிவு கோடிக்கணக்கான இந்து மக்களின் உணர்வைச் சிறிதும் கண்டுகொள்ளவில்லை என்பதைக் காட்டுகிறது. பல்லாயிரக்கணக்கான ஆண்டுகாலப் பாரம்பரியம் கொண்ட ஒரு சடங்குக்கு நீதிமன்றத்தின் மூலம் அனுமதி பெற்ற பின்னரும், அதனை எதிர்த்து அரசு மேல்முறையீடு செய்வது வருத்தம் அளிக்கிறது.
தீபத்தை "கலவர தீபமாக" மாற்ற முயற்சி: கார்த்திகை தீபத்தை "கலவர தீபமாக" மாற்ற மதவெறி சக்திகள் எல்லா வகையிலும் முயலுகிறார்கள் என்று மதுரை எம் பி வெங்கடேசன் குறிப்பிட்டுள்ளார். இது ஒட்டுமொத்த முருக பக்தர்கள் மற்றும் இந்து மக்களிடையே வெறுப்பை சம்பாதிக்க கூடிய அவச்சொல். மக்கள் பிரதிநிதியாக பொறுப்பில் இருந்து கொண்டு இப்படி பொறுப்பற்ற முறையில் மதங்கள் குறித்து மதுரை எம். பி வெங்கடேசன் எதிர்மறையாக பேசி வருவது மிகவும் கண்டனத்துக்குரியது.
மேலும் திருவண்ணாமலையில் மகா தீபம் ஏற்றப்படுவது போல, திருப்பரங்குன்றம் மலையிலும் கார்த்திகை தீபம் ஏற்றுவது என்பது பக்தர்களுக்கு மிகவும் புனிதமான ஒரு நிகழ்வாகும். கோயில்கள் மற்றும் பக்தர்களின் நலனைப் பாதுகாக்க வேண்டிய அறநிலையத்துறை, இந்துக்களின் உரிமைகளுக்கு எதிராகச் செயல்படுவது ஏற்புடையது அல்ல. உடனடியாக மேல்முறையீடு செய்யும் முடிவைத் தமிழக அரசு கைவிட்டு, இந்துக்களின் பாரம்பரிய நம்பிக்கைகளைப் பாதுகாக்க வேண்டும்," தவறினால் வரக்கூடிய 2026 ஆம் ஆண்டு சட்டமன்ற தேர்தலில் தமிழக மக்கள் குறிப்பாக இந்துக்கள் முதலமைச்சர் ஸ்டாலினுக்கு தக்க பாடம் புகட்டுவார்கள் என்று அவர் வலியுறுத்தியுள்ளார்.