நெல்லை சந்திப்பில் பரபரப்பு: பூரண சந்திரன் மறைவுக்கு மோட்ச தீபம் ஏற்ற முயன்ற பாஜகவினர் 30 பேர் அதிரடி கைது!
மதுரை திருப்பரங்குன்றத்தில் தீபம் ஏற்ற அனுமதி கோரி தனது இன்னுயிரைத் தியாகம் செய்த பூரண சந்திரனின் ஆன்மா சாந்தியடைய வேண்டி, திருநெல்வேலியில் மோட்ச தீபம் ஏற்ற முயன்ற பாஜக நிர்வாகிகள் மற்றும் தொண்டர்களைக் காவல்துறை கைது செய்தது.
மதுரை திருப்பரங்குன்றம் மலைப்பகுதியில் பாரம்பரிய முறைப்படி தீபம் ஏற்ற அனுமதிக்க வேண்டும் என்ற கோரிக்கையை வலியுறுத்தி வந்தவர் பூரண சந்திரன். இக்கோரிக்கை நிறைவேறாத விரக்தியில் அவர் தனது உயிரை மாய்த்துக்கொண்ட சம்பவம் தமிழக பாஜகவினர் மற்றும் ஆன்மீகவாதிகள் இடையே பெரும் சோகத்தை ஏற்படுத்தியது.
அவரது தியாகத்தைப் போற்றும் வகையிலும், மறைந்த ஆன்மா சாந்தியடையவும் தமிழகம் முழுவதும் பாஜக சார்பில் அஞ்சலி செலுத்தப்பட்டு வருகிறது.
இதன் ஒரு பகுதியாக, இன்று திருநெல்வேலி வடக்கு மாவட்ட அனைத்து மண்டல் தலைவர்கள் மற்றும் சார்பு அணிகளின் நிர்வாகிகள் ஒருங்கிணைந்து, திருநெல்வேலி சந்திப்பு ரயில் நிலைய நுழைவாயில் முன்பாக "மோட்ச தீபம்" ஏற்றும் போராட்டத்திற்கு அழைப்பு விடுத்திருந்தனர்.இந்த நிகழ்விற்குப் பின்வரும் முக்கிய நிர்வாகிகள் தலைமை வகித்து முன்னின்று நடத்தினர்:
மலையரசன் (தச்சநல்லூர் நகர் தெற்கு மண்டல் தலைவர்)., முருகதாஸ் (பட்டியல் அணி மாநில செயலாளர்)., சத்ய நாராயணன், ஆரியங்காவு (மண்டல் பொது செயலாளர்கள்)
J.V. மாரியப்பன் (தமிழ் வளர்ச்சி பிரிவு மாவட்ட தலைவர்) முருகப்பா (நெசவாளர் பிரிவு மாநில செயலாளர்)
மற்றும் ஏராளமான மண்டல் நிர்வாகிகள் திரளாகப் பங்கேற்றனர்.
ரயில் நிலையத்தின் முன்பு நிர்வாகிகள் விளக்கேற்றத் தொடங்கியபோது, அங்கு பாதுகாப்புப் பணியில் இருந்த மாநகரக் காவல்துறை அதிகாரிகள் அவர்களைத் தடுத்து நிறுத்தினர். "பொது இடத்தில் அனுமதியின்றி இதுபோன்ற நிகழ்வுகளை நடத்தக் கூடாது" எனப் போலீசார் எச்சரித்தனர்.
இதனால் ஆத்திரமடைந்த பாஜகவினர், "இது ஒரு அமைதியான அஞ்சலி நிகழ்வு, இதற்கு ஏன் முட்டுக்கட்டை போடுகிறீர்கள்?" என்று காவல்துறையினருடன் கடும் வாக்குவாதத்தில் ஈடுபட்டனர். இதனால் இரு தரப்பினருக்கும் இடையே சிறிது நேரம் பரபரப்பு ஏற்பட்டது பின்னர் அனைவரையும் போலீசார் கைது செய்தனர்