நெல்லையில் விநாயகர் சிலை அகற்றம் : கொதித்தெழுந்த இந்து முன்னணியினர் மற்றும் பாஜகவினர் ; நெல்லையில் பரபரப்பு

நெல்லையில் போராட சென்ற பாஜக ஆன்மீகப் பிரிவு நிர்வாகிகள் மற்றும் பாஜக ஆன்மிக பிரிவு மாவட்ட தலைவர் உட்பட பலர் கைது

திருநெல்வேலி மாவட்டம், மேலப்பாளையத்தில் ஒரு தனியார் உணவகத்தின் அருகே, அந்த கடையின் உரிமையாளரால் பிரதிஷ்டை செய்யப்பட்டு வழிபாடு நடத்தப்பட்டு வந்த விநாயகர் சிலையை, நெல்லை மாநகர காவல் துறையினர் முறையான அனுமதி பெறாமல் சிலை பிரதிஷ்டை செய்யப்பட்டதாகக் கூறி நேற்று நள்ளிரவு அகற்றினர். 

கடப்பாரை போன்ற ஆயுதங்களைக் கொண்டு விநாயகர் சிலையை இடித்து அங்கிருந்து அப்புறப்படுத்திய சம்பவத்திற்கு எதிர்ப்பு தெரிவித்து அப்பகுதிப் பொதுமக்களும் பெண்களும் போலீசாருடன் கடுமையான வாக்குவாதத்தில் ஈடுபட்டனர்.

இந்து முன்னணி மாநிலச் செயலாளர் வீட்டுச் சிறை:

இந்தச் சம்பவம் குறித்துத் தகவல் அறிந்த இந்து முன்னணி மாநில செயலாளர் குற்றாலநாதன் தலைமையில் நிர்வாகிகள் போராட்டத்தில் ஈடுபடவிருப்பதாக வெளியான தகவலை அடுத்து, குற்றாலநாதனை அவரது வீட்டிலேயே போலீசார் கைது செய்து வீட்டுச் சிறையில் வைத்தனர்.

இந்தச் சூழலில், "சிலை வைத்து பிரதிஷ்டை செய்து வழிபடுவதற்குத்தான் அனுமதி பெற வேண்டும்; விநாயகரின் புகைப்படத்தை வைத்து வழிபாடு செய்வதற்கு அனுமதி வாங்கத் தேவையில்லை" என்று கூறி, தமிழக பாஜக ஆன்மீகம் மற்றும் திருக்கோவில் மேம்பாட்டுப் பிரிவு மாநில செயலாளர் எஸ். சங்கரசுப்பிரமணியன் மற்றும் நெல்லை வடக்கு மாவட்ட பாஜக ஆன்மீகம் மற்றும் திருக்கோவில் மேம்பாட்டுப் பிரிவு தலைவர் சுப்பிரமணியம் என்ற சந்தோஷ் ஆகியோர் தலைமையில் ஆன்மீகம் மற்றும் திருக்கோவில் மேம்பாட்டுப் பிரிவு நிர்வாகிகள் சம்பவ இடத்திற்குச் சென்றனர். அவர்களை போலீசார் தடுத்து நிறுத்தி வலுக்கட்டாயமாகக் கைது செய்தனர்.

கைது செய்யப்பட்ட பாஜக ஆன்மீகப் பிரிவைச் சேர்ந்த நிர்வாகிகள் தமிழக அரசுக்குக் கடுமையான கேள்விகளை எழுப்பினர். "விநாயகர் புகைப்படத்தை வைத்துக் கூட வழிபடுவதற்கு தமிழகத்தில் அனுமதி இல்லையா?" என்று அவர்கள் கேள்வி எழுப்பினர்.

மேலும், இந்தப் போராட்டத்தின்போது திரண்டிருந்த பொதுமக்கள், "தமிழகத்தில் நாள்தோறும் நடைபெறும் திருட்டு மற்றும் கொலை சம்பவங்களில் சம்பந்தப்பட்ட குற்றவாளிகளை எல்லாம் இந்த அரசு தண்டிக்காமல், ஆன்மீகத்தில் ஈடுபாடு உடைய இந்துக்களை அடக்குவதில் மட்டுமே திமுக அரசு முக்கியத்துவம் கொடுப்பதாக"க் குற்றம் சாட்டினர்.

இந்தப் போராட்ட முயற்சியில் தமிழக பாஜக ஆன்மீக பிரிவு நிர்வாகிகள் மற்றும் பாஜக தொண்டர்கள் பலர் கலந்து கொண்டனர்.

.......