தென்காசி கல் குவாரி வழக்கு: ட்ரோன் மூலம் அளவீடு செய்த அறிக்கையைத் தாக்கல் செய்ய உயர் நீதிமன்றம் அதிரடி உத்தரவு!
07.11.2025 | தென்காசி மாவட்டத்தில் உள்ள கல் குவாரிகளில் சட்டவிரோத நடவடிக்கைகள் மற்றும் அதிகளவில் கனிமங்கள் வெட்டி எடுக்கப்படுவதாகக் கோரிய வழக்கில், ட்ரோன் மூலம் அளவீடு செய்யப்பட்ட அறிக்கையைத் தாக்கல் செய்யுமாறு தமிழக அரசுக்கு உயர் நீதிமன்ற மதுரை கிளை உத்தரவிட்டுள்ளது.
தென்காசி மாவட்டம் புளியரையைச் சேர்ந்த ஜமீன் என்பவர், உயர் நீதிமன்ற மதுரை அமர்வில் மனு ஒன்றைத் தாக்கல் செய்திருந்தார். அந்த மனுவில், "தென்காசி மாவட்ட கல் குவாரிகளில் அனுமதி பெற்ற அளவை காட்டிலும் அதிகளவில் கற்கள் வெட்டி எடுக்கப்பட்டு, கேரள மாநிலத்துக்கு கனரக வாகனங்களில் கொண்டுச் செல்லப்படுகிறது. பல குவாரிகள் சட்டவிரோதமாக செயல்படுவதால் தமிழக அரசுக்கு பெரியளவில் வருவாய் இழப்பு ஏற்பட்டு வருகிறது. எனவே, தென்காசி மாவட்ட கல் குவாரிகளை ட்ரோன் மூலம் ஆய்வு நடத்தி உரிய நடவடிக்கை எடுக்க உத்தரவிட வேண்டும்" என்று கோரியிருந்தார்.
இந்த வழக்கு, நீதிபதிகள் அனிதா சுமந்த் மற்றும் குமரப்பன் அமர்வு முன்பு விசாரணைக்கு வந்தது.
அப்போது அரசுத் தரப்பில் ஆஜரான வழக்கறிஞர், "தென்காசி மாவட்டத்தில் மொத்தம் 45 கல் குவாரிகள் உள்ளன. இதில் ட்ரோன் மூலமாக அளவீடு பணிகள் முடிவடைந்துள்ளன" என்று தெரிவிக்கப்பட்டது.
இதனைக் கேட்ட நீதிபதிகள், "ட்ரோன் மூலம் அளவீடு பணி முடிந்தால், அந்த அறிக்கை எங்கே?" என்று கேள்வி எழுப்பினர். அதற்கு அரசுத் தரப்பு, அறிக்கை விரைவில் தாக்கல் செய்யப்படும் என்று உறுதியளித்தது.
அப்போது மனுதாரர் தரப்பில் ஆஜரான வழக்கறிஞர், "அளவிடும் பணியில் பல குளறுபடிகள் நடந்துள்ளன. எனவே, ஒரு வழக்கறிஞர் ஆணையம் நியமனம் செய்து, ட்ரோன் மூலம் அளவிடும் பணியை மீண்டும் நடத்த வேண்டும்" என முறையீடு செய்தார்.
மனுதாரரின் கோரிக்கையைப் பரிசீலித்த நீதிபதிகள், "முதலில் அறிக்கை தாக்கல் செய்யட்டும். அதில் என்னென்ன குளறுபடிகள் உள்ளன என்பதைப் பிறகு பார்ப்போம்" என்று தெரிவித்து, அரசுத் தரப்பு அறிக்கை தாக்கல் செய்ய இறுதி அவகாசம் வழங்கி, வழக்கின் விசாரணையை ஒத்தி வைத்தனர்.