லாலிபாப் கொடுத்த சிறுமி: திருடனின் மனதை மாற்றிய பாசப் பிணைப்பு! மும்பையில் நெகிழ்ச்சி சம்பவம்
மும்பையில் வணிகம் நடத்தி வரும் சுரேந்தர் சிங் என்பவருக்குச் சொந்தமான கடைக்குள் சமீபத்தில் ஒரு திருடன் புகுந்தான். கடைக்குள் நுழைந்த திருடன், சுரேந்தர் சிங்கிடம் இருந்த பணம் மற்றும் செல்போனைப் பறிக்க முயற்சி செய்ததோடு, அவரை மிரட்டியும் இருக்கிறான்.
இந்தச் சம்பவத்தின்போது சுரேந்தர் சிங் அருகில் அவரது 5 வயது மகள் அமர்ந்திருந்தார். அந்தச் சிறுமி அப்போது ஒரு லாலிபாப் மிட்டாய் சாப்பிட்டுக் கொண்டிருந்தாள்.
தன் தந்தையை அந்தத் திருடன் தாக்குவதையும் மிரட்டுவதையும் கண்ட அந்த மழலை பயப்படாமல், துணிவுடன் செயல்பட்டாள். தன் கையில் வைத்திருந்த லாலிபாப் மிட்டாயை அவனிடம் நீட்டிய சிறுமி, "உனக்கு வேணுமா? இதை நீ சாப்பிடு, என் அப்பாவை அடிக்காதே" என்று ஹிந்தியில் கூறியிருக்கிறாள்.
ஒரு சிறுமியின் இந்த எதிர்பாராத பாச வார்த்தைகள் திருடனை நிலைகுலையச் செய்தன. அந்த மழலையின் அன்பான பேச்சைக் கேட்டு ஒரு கணம் அவன் கண்கலங்கிப்போனான்.
உடனடியாகத் தான் திருடிய அனைத்துப் பணத்தையும் அங்கேயே வைத்துவிட்டு, "இந்த மிட்டாயை நீயே சாப்பிடு செல்லம்" என்று குழந்தையிடம் கூறிவிட்டு, அன்பின் வெளிப்பாடாக அந்தச் சிறுமிக்கு ஒரு முத்தத்தைக் கொடுத்துவிட்டு, எந்தவித இடையூறும் செய்யாமல் அங்கிருந்து அமைதியாகத் திரும்பிச் சென்றான்.
இந்தச் சம்பவங்கள் அனைத்தும் கடையில் பொருத்தப்பட்டிருந்த சிசிடிவி கேமராவில் தெளிவாகப் பதிவாகியிருந்தன.
திருடன் தன் குழந்தையின் ஒரே வார்த்தையால் மனம் திருந்தி, திருடிய பொருள்களை அங்கேயே வைத்துவிட்டுச் சென்றதால், சுரேந்தர் சிங் இதுகுறித்து காவல்துறையிடம் புகார் அளிக்கவில்லை. இருப்பினும், இந்தக் காட்சிகள் தற்போது வெளியாகி, குற்றச் செயல்களில் ஈடுபடுபவர்களின் மனதில்கூட மனிதநேயம் மறைந்திருக்கக்கூடும் என்பதை உணர்த்தி, பொதுமக்களிடையே பெரும் நெகிழ்ச்சியை ஏற்படுத்தியுள்ளன. ஒரு லாலிபாப் மிட்டாயும், மழலையின் அன்பும் இணைந்து நிகழ்த்திய இந்த மாற்றம் அனைவராலும் பாராட்டப்பட்டு வருகிறது.