கோவையில் தென்னிந்திய இயற்கை வேளாண் மாநாட்டில் பங்கேற்கிறார் பிரதமர் நரேந்திர மோடி
பாரதப் பிரதமர் மாண்புமிகு நரேந்திர மோடி அவர்கள் வருகின்ற நவம்பர் 19-ஆம் தேதி தமிழகத்தின் தொழில் நகரமான கோயம்புத்தூருக்கு வருகை தர இருக்கிறார். நாட்டின் தலைமகன் தமிழகம் வருவதை முன்னிட்டு, ஆயத்த பணிகள் மும்முரமாக தொடங்கி நடைபெற்று வருகிறது.
பிரதமர் மோடி அவர்கள் கோயம்புத்தூரில் உள்ள கொடிசியா வர்த்தக கண்காட்சி வளாகத்தில் நடைபெறவுள்ள 'தென்னிந்திய இயற்கை வேளாண் மாநாடு 2025'-ஐ தொடங்கி வைத்து உரையாற்றுகிறார்.
விவசாய சங்கங்கள் இணைந்து ஏற்பாடு செய்துள்ள இந்த மாடு, மறைந்த இயற்கை வேளாண் விஞ்ஞானி கோ. நம்மாழ்வார் அவர்களின் விவசாய முறைகளை முன்னெடுத்துச் செல்வதையும், இயற்கை மற்றும் புதுப்பிக்கத்தக்க விவசாய முறைகளை ஊக்குவிப்பதையும் நோக்கமாகக் கொண்டுள்ளது.
பிரதமர் மோடி அவர்கள் மாநாட்டைத் தொடங்கி வைத்த பின்னர், தென் இந்திய மாநிலங்களில் இருந்து வந்திருக்கும் இயற்கை மற்றும் கரிம விவசாயத்தில் நிபுணத்துவம் பெற்ற சுமார் 50 முன்னணி விஞ்ஞானிகளுடன் கலந்துரையாட இருக்கிறார். இது இயற்கை விவசாயத்தை விரிவுபடுத்துவதற்கான புதிய கொள்கை யோசனைகளை உருவாக்குவதில் கவனம் செலுத்தும்.
இந்த மூன்று நாள் மாநாட்டில் 300 கண்காட்சி அரங்குகள், நேரடி செயல் விளக்கங்கள் மற்றும் விஞ்ஞானிகள், கொள்கை வகுப்பாளர்களின் அமர்வுகள் ஆகியவை இடம்பெற உள்ளன.
பாதுகாப்பு ஏற்பாடுகள்:
பிரதமரின் வருகையை முன்னிட்டு கோவை மாநகரம் முழுவதும் உச்சக்கட்ட பாதுகாப்பு ஏற்பாடுகள் செய்யப்பட்டுள்ளன.
சுமார் 3,000 போலீசார் பாதுகாப்புப் பணியில் ஈடுபடுத்தப்பட்டுள்ளனர். மேலும், போக்குவரத்து மாற்றங்கள் குறித்தும் அறிவிப்புகள் வெளியிடப்பட்டுள்ளன.
பிரதமரின் வருகை தமிழக விவசாயிகளுக்கு ஊக்கமளிப்பதோடு, அடுத்த ஆண்டு வரவிருக்கும் சட்டமன்றத் தேர்தலுக்கான அரசியல் முக்கியத்துவம் வாய்ந்ததாகவும் கருதப்படுகிறது.
இந்தியாவின் தலை மகனாக இருக்கக்கூடிய பாரத பிரதமர் நரேந்திர மோடி தமிழகம் வருகையை முன்னிட்டு தமிழக பாஜகவின் தேர்தல் வியூகங்கள் மற்றும் பிரச்சாரங்கள் களைகட்டி வருகிறது. பிரதமர் நரேந்திர மோடியின் இந்த வருகை ஒட்டுமொத்த தமிழக பாஜக நிர்வாகிகள் மத்தியிலும் ஒரு புத்துணர்ச்சியையும் புது நம்பிக்கையையும் ஏற்படுத்தி உள்ளது