நெல்லையில் தரங்கெட்ட சாலை பள்ளத்தில் சிக்கிய பள்ளி வாகனம்: 30 குழந்தைகள் அதிர்ஷ்டவசமாக உயிர் தப்பினர்!

திருநெல்வேலி மாநகராட்சிக்கு உட்பட்ட கே.டி.சி. நகர் அருகே உள்ள டார்லிங் நகர் பகுதிகளில், மாநகராட்சியின் அலட்சியத்தால் மோசமடைந்த சாலைகளில் ஏற்பட்ட விபத்தில், பள்ளி வாகனம் பள்ளத்தில் சிக்கியது.

 பாதாள சாக்கடை மற்றும் குடிநீர் இணைப்புப் பணிகளுக்காகத் தோண்டப்பட்ட பள்ளங்கள் முறையாக மூடப்படாமல், தற்காலிகமாக செம்மண்ணைக் கொண்டு மூடப்பட்டதன் காரணமாக சாலைகள் மிகவும் மோசமான நிலையில் காணப்படுகின்றன.

இந்நிலையில், இன்று காலை கே.டி.சி. நகரில் உள்ள ஓயாசிஸ் பள்ளிக்குச் சொந்தமான வாகனம், சுமார் 30 குழந்தைகளை ஏற்றிக்கொண்டு பள்ளிக்குச் சென்றபோது, டார்லிங் நகர் பகுதியில் வந்துகொண்டிருந்தது. அப்போது செம்மண்ணால் மூடப்பட்டிருந்த ஒரு பெரிய பள்ளத்தில் வேனின் ஒரு டயர் எதிர்பாராதவிதமாகச் சிக்கியது. 

இதனால் நிலைகுலைந்த வாகனம் மேலும் நகர முடியாமல் பள்ளத்திலேயே சிக்கிக் கொண்டது.

நல்வாய்ப்பாக, பள்ளத்தில் சிக்கிய வாகனம் அங்கும் இங்கும் பிறழாமல் ஒரே இடத்தில் ஸ்தம்பித்து நின்றதால், வேனில் பயணம் செய்த 30க்கும் மேற்பட்ட மாணவர்கள் அதிர்ஷ்டவசமாகப் பெரிய விபத்து ஏதுமின்றி உயிர் தப்பினர். உடனடியாக ஓட்டுநர் வேனை மீட்கப் பலமுறை முயற்சி செய்தும் பலனளிக்கவில்லை.

இதனையடுத்து, அவ்வழியே வந்த அதே பள்ளியின் சக வாகன ஓட்டுநர்கள் சைக்கிள் டயர்களை ஒன்றோடொன்று இணைத்துக் கட்டி வேனை மீட்க முயற்சித்தனர். ஆனால் அந்த முயற்சியும் தோல்வியில் முடிந்தது.

தற்போது, பள்ளத்தில் புதைந்த பள்ளி வாகனத்தை மீட்க ஜேசிபி இயந்திரம் வரவழைக்கப்பட்டு பணிகள் நடைபெற்று வருகின்றன.

பாதாள சாக்கடை மற்றும் குடிநீர் அமைப்பிற்காகத் தோண்டப்பட்ட பள்ளங்களை முறையாக மூடாமல் மாநகராட்சி நிர்வாகம் அலட்சியம் காட்டி வருவதாலேயே இதுபோன்று அடிக்கடி வாகன விபத்துகள் ஏற்படுவதாக அப்பகுதி மக்கள் குற்றம் சாட்டியுள்ளனர். 

எனவே, நெல்லை மாநகராட்சி நிர்வாகம் உடனடியாக இந்த மோசமான சாலைகளைச் சீர்செய்து கொடுக்க வேண்டும் என்றும், இது போன்ற சம்பவங்கள் மீண்டும் நிகழாமல் இருக்கத் தக்க நடவடிக்கை எடுக்க வேண்டும் என்றும் பொதுமக்கள் கோரிக்கை விடுத்துள்ளனர்.