ஆசிரியர் திட்டியதால் 10 ஆம் வகுப்பு மாணவன் தற்கொலை : பள்ளி பேருந்துக்கு தீ வைத்த உறவினர்கள் , பதற்றம்

வீரவநல்லூர் அருகே உள்ள மானாபரநல்லூர் வடக்கு தெருவை சேர்ந்தவர் நல்லகண்ணு மகன் சங்கரகுமார்(43), விவசாயி. இவருக்கு திருமணம் முடிந்து முத்துலட்சுமி என்ற மனைவியும் சபரிகண்ணன் (15) என்ற மகனும், ஒரு மகளும் உள்ளனர். இதில் சபரிகண்ணன் வீரவநல்லூரில் உள்ள தனியார் மெட்ரிகுலேஷன் பள்ளியில் பத்தாம் வகுப்பு படித்து வந்தார்.

 மாணவனை பள்ளி ஆசிரியர்கள் கடந்த ஜூலை 4ல் கண்டித்ததாக கூறப்படுகிறது. இதில் விரக்தி அடைந்த சபரிகண்ணன் விடுமுறை முடிந்து கடந்த ஜூலை.7ல் பள்ளிக்கு வந்துள்ளார். அப்போது பள்ளி கேட் அருகே வைத்து சபரிகண்ணன் மறைத்து வைத்திருந்த வயலுக்கு பயன்படுத்தும் களைக்கொல்லி மருந்தை எடுத்து குடித்துவிட்டு பள்ளிக்குள் சென்றுள்ளார். இதனையயடுத்து பள்ளியில் பிரேயர் நடக்கும் போது மயங்கி விழுந்த சபரிகண்ணனை ஆசிரியர்கள் மீட்டு சேரன்மாதேவி அரசு மருத்துவமனைக்கு கொண்டு சென்றுள்ளனர். அங்கு அவருக்கு முதலுதவி சிகிச்சை அளிக்கப்பட்டு மேல் சிகிச்சைக்காக மதுரையில் உள்ள ஒரு தனியார் மருத்துவமனைக்கு அவரது உறவினர்கள் கொண்டு சென்றனர். அங்கு 10 நாட்கள் சிகிச்சையில் இருந்த சபரி கண்ணன் சிகிச்சை பலனளிக்காமல் இன்று காலை உயிரிழந்தார். இதுகுறித்து தகவல் அறிந்த அவரது உறவினர்கள் நெல்லை அம்பை பிரதான சாலையில் வீரவநல்லூர் காவல் நிலையம் முன்பு மாணவரின் சடலம் கொண்டு வந்த வாகனத்துடன் சாலை மறியலில் ஈடுபட்டனர். இதனால் சுமார் 20 நிமிடத்திற்கும் மேலாக போக்குவரத்து பாதிப்பு ஏற்பட்டது. இதுகுறித்து தகவல் அறிந்த சேரன்மகாதேவி டிஎஸ்பி சத்யராஜ், அம்பை டிஎஸ்பி சதீஷ்குமார் ஆகியோர் சம்பவ இடத்திற்கு விரைந்து சென்று சபரிகண்ணனின் உறவினர்களுடன் பேச்சுவார்த்தை நடத்தினர். அப்போது சபரிகண்ணனின் உறவினர்கள் பள்ளி தாளாளர், தலைமை ஆசிரியர், வகுப்பு ஆசிரியைகள் உள்ளிட்ட ஐந்து பேர் மீது வழக்கு பதிவு வேண்டுமென்று கோரிக்கை விடுத்தனர். இது குறித்து அதிகாரிகள் உரிய நடவடிக்கை எடுக்கப்படும் என உறுதி அளித்ததை அடுத்து சபரி கண்ணனின் உறவினர்கள் கலைந்து சென்றனர். இச்சம்பவத்தால் அப்பகுதியில் சுமார் 2 மணி நேரத்துக்கு மேலாக பரபரப்பு ஏற்பட்டது.